Guata Obed mitanander, Ihr Bürgersleut,
die ihr alle zur Bürgerversammlung komma send heut.
Über Verwaltungsanschluß oder Einheitsgemeinde
sollet mer heut diskutiere,
saget euer Ansicht oder froget
ond dent euch ja et scheniera.
Seid nett zuenander, machet bitte koin Krach.
Für da Kreis Göppinga langt scho Hohastaufa ond Birabach.

Es goht um Holzhausa, des isch amol so,
es goht in gar keiner Hinsicht heut om a Perso.
Jeder em Saal möcht doch aufg'schlossa sei,
aber et erscht bis en a paar Stond noch 6 Viertele Wei.
A jeds möcht sei Asicht doch sa, ganget mer
oder ganget mer net noch Uhinga na.
Wenn mer jetzt ganget, gäb's dofür no Geld,
wenn mer später na müßt, sei's schlechter bestellt.

Ons Bürgerinna ond Bürger will mer dorüber höra,
sogar a Abstimmung soll dazu gehöra.
Doch darüber entscheide duat en der schwerwiegenda Sach
alloi dr Gmoidrot - des send Leut ja vom Fach.

Jedoch isch des ganz bestimmt gar net so leicht,
i glaub, daran hot dr Gmoidrot koi Freud.
Wnn mer Geld hätt wie et ond 's wär sonscht älles guat,
no bräucht mer derzu eigentlich gar et viel Mut.
No ließt mer äller laufa, 's wär et zom Verarge
ond mir würdet dui Selbständigkeit no a paar Jährle b'halta.
Doch wie des halt amol so isch auf dr Welt,
's dreht sich halt älles oms liebe Geld.
Mir Holzhäuser send do gar et reich g'segnet,
a Milliona-Onkel ischt ons überhaupt noid begegnet.
Ja, so a paar Millione dätet uns scho ebbes nutza,
do könnt mer des Gmoidle a bissle rausputze.
Drom müßt mer überlega: wöllet mer des Zuckerbrot nemme?
Do liegt für d Holzhäuser viellecht ebbes drenna.

Eigentlich muß i mi do gar et lang b'senna,
i möcht des Kend beim Nama nenne.
Holzhausa ond Uhinga - do isch gar nex zom macha
- die beide send oifach zusammag'wachse.
Recht viel Gemeinsammes hetn mir mitenander,
des woiß jedes bestemmt,
mer muß sich bloß wonfra, daß die boid no net g'heiratet hent.

Mit de Uhinger waret mir no gar nie a'gschmiert,
mer sieht's an onserem Paul Rupp,
der scho 22 Johr en Holzhausa dirigiert.

Dui Milchgesellschaft ond Raiffeisenbank
hent Holzhäuser Baura mit de Uhinger,
des isch ja bekannt.
Als Leiter hent se do en ganz gua Ma derzu g'fonda,
da Stohrers Fritz en Uhinga dronta.

Mir hent des praktisch scho erlebt,
daß gemeinschaftlich es besser geht.
Wenn onsere Stroßa net auf Pfiff
ond 's Kenderfest isch schau en Sicht,
no fend i 's oifach wirklich schö,
wenn Uhinga schickt sei Kehrmaschee.
Dent mir hier a Stroß mol baua,
no muß mer noch ema Planer schaua,
no ganget mir, i muß halt sa, auf's Ortsbauamt noch Uhinga na.
Die planet für ons billig ond fei,
dui stoht am rechta Platz - des isch zum Loba.
Do isch zwischa Holzhausa ond Uhinga alles bereiningt,
do sitzet se beianander ond send sich einig.

I frog mi drom ond muß mi gar et lang b'senna:
Was uat die Holzhäuser ond Uhinger trenna?
Mit dem Vertrag ond a bisle Vertraue
könnt mer doch beruhigt en d' Zukunft schaua.
A schöns Plätzle für a Freibad
hent d' Uhinger sogar g'fonda:
ganz en dr Nähe am Wiesbach dronta.
Für unsre Jugend dent die Uhinger viel
- des isch wirklich zum Loba -
denket doch an des nui Schulhaus am Haldaberg droba!
Au mit em Wasser hot mer a Lösung g'fonda:
Mer wird mit Uhinga direkt verbonda.
'S lauf au sonscht no a Wässerle noch Uhinga na,
an dem sei a ganz b'sonders G'schmäckle dra.
Ond als Dank für alles - wie sich's g'hört -
hent mir en Teil von onserem Müll auf d' Uhinger Markung nag'letgt.
Dorom verteh i eigentlich nie
wie mer sa ka, mir würdet für die Uhinger bloß a Saukolonie.

A Häasle, a Gärtle möcht bald jeder besitza,
des duat dr Familie ond em Frieda recht nütza.
Was i für mi beanspruch - wenn i des de andre verwehr,
geroicht mir des bestemmt et zur b'sondre uhr.

Doch jetzt ja i Schlß - no ois will i sa:
wenn mer uf da Zug wöllet, müaßt mer doch noch Uhinga na.

Zurück